Gure herria

Otsondoko gainetik hurbil, Amaiur da Baztango hondar herria, Iruñetik Baionako bidean.

Udalerri beregaina izan zen, 1969an Baztan Ibarreko Udalean sartu arte.

Herrira sartzean, eliza aurkituko dugu lehendabizi. Erdi Aroan eraiki bazen ere, gaztelua suntsitzetik ateratako harriekin egin zen eraldaketa nagusia.

Eliza ingurua iraganik, karrikan goiti abiatuko gara eta arku famatuak eginen digu ongietorria.

Amaiur karrika nagusi bakar eta luzeko herria da; hara ematen dute herriko ia etxe gehienek.

Aipatzekoak dira Borda eta Arretxea jauregiak, XVII. mendeko eraikin dotoreak.

Herriko bestak abuztuaren 15ean egiten dira, eta izen handikoak dira urteroko artzain txakur lehiaketa, eta “Baztan zopak” eta zikiro jateak.

1922. urtean eraiki zen Amaiurko monumentua, denboraz gaztelua zegoen toki berean.

Izan ere, 1522. urtean Gaztelarekin elkartu nahi ez zuten Nafarroako erresumako azken defendatzaileak gogor aritu ziren borrokan hemen.

Gotorleku hartan, bertzeak bertze, Migel Jatsukoa zegoen, Frantzisko Xabierkoaren anaia.

Amaiurko gazteluaren historia: Jon Maia

Gaizka Aranguren kazetariak gidatutako saio honek Euskal Herriko historia jorratuko du, baina estilo erabat berritzaile batean, gure herriko aurpegi ezagunenetako batzuek lagunduta.